Walang Kalabaw sa Cubao

by Ericson Acosta
Walang kalabaw sa Cubao
Pero sa loob ng videokeng Fiesta carnival
May mga kabayong baby-blue
At isang kubang Tyrannosaurus Rex
Habang sa magkabilang dulo
Ng Goldilocks at showroom
Ng Automatic Center
Naroon naman ang mga Tamaraw
FX na ngayo’y pastul-pastol
Ng mga kolorum na dispatser:

Mga bastardong anak
Nina Aurora’t Epifanio
Na ang langibang pusod
Ay kakabit pa rin
Ng matris ng estero;
Mga binatilyong binabansot
Sa lilim ng Big Dome
Sa anino ng kongkretong domino
Ng tinatayong tulay ng MRT-2;
Mga supot na sakristang simsim-
Simsim ang insenso ng tambutso,
Papak-papak ang beintesingko—
Ang ostiang kabayaran
Sa taimtim na pagkabisado
At paghiyaw sa mga litanya
Nina SANTA LUCIA, SANTA LUCIA
At SAN MATEO, SAN MATEO
At sa banal na amen ng
Hoy, ‘tang ‘na kang
Hayop kang hindot ka, nauna ‘ko sa ‘yo dito!

At ngayon, kagat-kagat nila
Ang labi ng alas-dos
Pilit na tinitiklo ang antok
At nang ‘di malimot
Ang inalmusal na rugby sa may 7-11
Ang tinanghaliang bilog
At idlip sa gilid ng Tiririt
Ang hinapunang jakol
Sa CR ng Ali-Mall

Walang kalabaw sa Cubao:
Ang Cubao mismo ang kalabaw
At sila ang nakadapong langaw.